04 ஜூன் 2017

மயில் கண்ணீர்

ஆண் மயிலின் கண்ணீரைக் குடிப்பதால் பெண் மயில் கர்ப்பம் ஆகிறதா

மயில் தன் தோகையை விரித்தால் அழகு... ஆடினால் பேரழகு. ஆண் மயிலுக்குத் தான் தோகை. பெண் மயிலுக்குத் தோகை இல்லை.

 

சரி. ஆண் மயில் உறவு கொள்ளாது. ஆண் மயிலின் கண்ணீரைக் குடிப்பதால் தான் பெண் மயில் கர்ப்பம் ஆகிறது. ஆண் மயிலின் இந்தப் புனிதத் தன்மையால் தான் அது இந்தியாவின் தேசிய பறவையாக உள்ளது. இப்படி ஒருவர் பதிவு செய்தார். இன்னொருவர் சரி என்றும் சொல்லி இருக்கிறார்.

ஆண் மயிலின் கண்ணீரைக் குடிப்பதால் தான் பெண் மயில் கர்ப்பம் ஆகிறது என்பதை என்னால் ஏற்றுக் கொள்ள முடியவில்லை. அறிவியல் ரீதியாகச் சான்றுகளும் இல்லை. அப்படிச் சொல்கிறவர்கள் தக்கச் சான்றுகளை வழங்க வேண்டும்.

நிலாவில் பாட்டி வடை சுடுகிறாள் என்று அம்மா சொன்னார். நிலாவைப் பார்த்துக் கொண்டே சோறு சாப்பிட்டோம். ஆனால் நீல் ஆர்ம்ஸ்ட்ரோங் நிலாவில் காலடி வைத்து போது சிலர் அதை ஓர் அப்ரஸ் கப்சா என்றார்கள்.
 

உண்மையில் பார்த்தால் அங்கே நிலாவில் பாட்டியும் இல்லை. வடையும் இல்லை. இன்னும் சிலர் நிலாவில் பாட்டி இருக்கிறாள் என்று சொல்லிச் சொல்லியே போய்க் கொண்டு இருக்கிறார்கள். தப்பாகச் சொல்லவில்லை. நவீன அறிவியல் உண்மைகளை ஏற்றுக் கொள்ள நாம் பழகிக் கொள்ள வேண்டும்.

ஆண் மயிலின் கண்ணீரைக் குடிப்பதால் தான் பெண் மயில் கர்ப்பம் ஆகிறது என்பது உண்மை என்றால் சரியான சான்றுகளைக் காட்ட வேண்டும். அப்போது நம்பலாம். உங்கள் பதிவுகளுக்கும் வலிமை இருக்கும். நாங்களும் ஏற்றுக் கொள்கிறோம்.

உலகத்தில் உள்ள எந்த ஒரு பெண் உயிரும் ஆணின் இனப்பெருக்க அணுக்கள் இல்லாமல் கரு தரிக்க முடியாது. அது தான் இயற்கையின் இனப் பெருக்க விதி. ஆண் மயிலின் கண்ணீரைக் குடிப்பதால் பெண் மயிலுக்குக் கரு தரிக்காது.


யாரோ சொன்னதை நாம் அப்படியே நம்பிவிடக் கூடாது. அவ்வாறு கருத்துச் சொன்னவர்களைத் தப்பாகச் சொல்லவில்லை. அது அவர்களின் கருத்துகள். இருந்தாலும் சான்றுகளை முன் வையுங்கள். ஏற்றுக் கொள்கிறோம்.

ஆண் மயிலுக்குப் பளபளக்கும் விசிறி போன்ற அழகிய தோகை. அதை விரித்தாடும் போது அழகிய அற்புதக் காட்சிகள். இந்தப் பகட்டான காட்சிகள் எதற்காக? பெண் மயிலைச் சுண்டி இழுக்கத் தான் என்பதை நான் சொல்லியா தெரிய வேண்டும்!

ஆண் மயிலுடன் இணைவதற்கு பெண் மயில் சற்று ‘பிகு’ பண்ணும். ஆனால் ஆண் மயிலின் கண்கவர் காட்சிகளைக் கண்டு பெண் மயில் சுத்தமாகக் கிரங்கி மயங்கிப் போய் விடும். ஆண் மயிலின் பரந்து விரிந்த தோகையின் வண்ண நிறக் கலவைகளைப் பார்த்து... பெண் மயில் அப்படியே சொக்கியும் போகும்.


உள்ளத்தைக் கொள்ளை கொள்ளும் அழகுடன் காட்சி அளிக்கும் அந்த ஆண் மயிலையே பெண் மயில் தன் ஆசைத் துணையாகவும் ஏற்றுக் கொள்ளும்.

ஓர் ஆண் மயில் ஐந்து பெண் மயில்கள் வரை தேர்ந்து எடுக்கும். ஒரு வருடத்தில் 25 மயில் குஞ்சுகளுக்குத் தகப்பனாகி விடும். (All species of peafowl are believed to be polygamous.) ஓர் ஆண் மயில் பல பெண் மயில்களுடன் இன உறவு வைத்துக் கொள்ளும். ஓர் ஆண் மயில் பலதாரத் திருமணத்திற்கு அரிச்சுவடி எழுதிய ஓர் உயிரினம். (சான்று: https://en.wikipedia.org/wiki/Peafowl#Behaviour)

ஓர் ஆண் மயில் ஒரு பெண் மயிலுடன் இணைவதற்கு முன்னரும் இணைந்த பின்னரும் இசைக் குரல் எழுப்பும். (சான்று: Singing in peacocks usually occurs just before, just after, or sometimes during copulation. - Yorzinski, Jessica L.; K. R. Annop (5 November 2012). "Peacock Copulation Calls Attract Distant Females". Ebscohost. Brill.)


ஆக மயில்கள் மற்ற உயிரினங்களைப் போலவே இனப் பெருக்கம் செய்கின்றன. ஆண் மயிலின் கண்ணீரைக் குடிப்பதால் பெண் மயில் கர்ப்பம் ஆவது இல்லை. எல்லா உயிரினங்களுக்கும் ஒரே மாதிரியான இனப்பெருக்க அணுகு முறை தான். மயிலுக்கு மட்டும் தனியாக எதுவும் இல்லை. கொஞ்சம் சிந்தித்துப் பாருங்கள். இது ஓர் அறிவியல் உண்மை.

அப்படியே ஆண் மயில்களின் கண்ணீரைப் பெண் மயில்கள் குடித்துக் குடித்துக் கர்ப்பம் ஆகி இருந்தால்... அதுவே உண்மையாக இருக்குமானால்... உலகத்தில் உள்ள எல்லா ஆண் மயில்களும் இப்போது குருட்டு ஆண் மயில்களாக அழுது அழுது அனாதை ஆசிரமங்களைத் தேடிப் போய் இருக்கும்.

ஏன் என்றால் பெண் மயில்களுக்கு கூரிய அலகு. அதாவது மூக்கு. அந்த அலகினால் ’அத்தான் உங்க கண்ணீரைக் குடிக்கிறேன்’ என்று சொல்லிச் சொல்லி... அப்படியே ஆண் மயில்களின் கண்களைக் கூரிய மூக்கினால் குத்திக் குத்தி... அப்புறம் கடைசியில் என்ன... உலகில் உள்ள எல்லா ஆண் மயில்களுமே குருடாகிப் போய் இருக்கும்.


அடுத்த பிறப்பில் ஓர் ஆண் மயிலும் இருக்காது. அப்புறம் நீங்க தான் ஓர் ஆண் மயிலாகப் பிறக்க வேண்டும். எப்படி உங்க வசதி.

இனப்பெருக்க காலத்திற்குப் பின் இறகுகளை உதிர்க்கும் காலம் உதயமாகும். ஒரு பெரிய ஆண் மயிலின் தோகையில் 200-⁠க்கும் அதிக இறகுகள் அடுக்கப்பட்டு இருக்கும்.

இந்தியக் கிராமவாசிகள் அவற்றைச் சேகரித்து மேலை நாடுகளுக்கு ஏற்றுமதி செய்வது வழக்கம். ஆனால் இந்த இனங்களைப் பாதுகாப்பதற்காக இப்படி ஏற்றுமதி செய்வது அண்மைய காலங்களில் தடை செய்யப்பட்டு உள்ளது.

இருந்தாலும் இன்னும் அவை விசிறிகளாகவும் வேறு சில அலங்கார பொருட்களாகவும் வலம் வரவே செய்கின்றன.


மாலை நேரத்தில் தூங்குவதற்கு தகுந்த இடம் தேடி மயில்கள் உயரமான மரங்களில் மெதுவாக ஏறுகின்றன. சூரியன் உதித்ததும் அவை மெதுவாக கீழே இறங்குகின்றன.

இந்த அப்பாவி ஜீவராசிகள் உங்களுடைய கண்களுக்கு விருந்தளிக்கலாம், ஆனால் அவற்றின் கீதமும் இதே போல உங்களுடைய செவிகளுக்கு விருந்தளிக்கலாம் என்று மட்டும் எதிர்பார்க்காதீர்கள். இரை தேடி கண்டுபிடிக்கும் வரை அவற்றின் ஓலம் மாலைப் பொழுதின் அமைதியை குலைத்துவிடும்.

மயில்கள் மரக்கறிகளையும் உண்ணும். புலாலையும் உண்ணும். சொல்லப் போனால் கண்டதை எல்லாம் தின்னும். விதைகள், தானியங்கள், பருப்புகள், பயிர்களின் இளந்தளிர் வேர்கள் ஆகியவற்றோடு பூச்சிகள், பல்லிகள் போன்றவற்றைச் சாப்பிடும். சில சமயங்களில் சிறு சிறு பாம்புகளையும் விட்டு வைப்பதில்லை.


மயில் கர்வம் பிடித்த பறவையாக தோன்றினாலும் அது மிகவும் பத்திரமாக உஷாராக இருக்கும். எடுத்துக்காட்டாக பதுங்கி வரும் பூனையைச் சட்டென்று கண்டு கொண்டு உரத்த சத்தம் போட்டுக் கொண்டே காட்டுக்குள் ஓடிவிடும்.

மற்ற மற்ற ஆண் மயில்களும் இந்த ஓட்டத்தில் சேர்ந்து கொள்ளும். ஆனால் என்ன தான் பெரிய ஆபத்துகள் வந்தாலும் பெண் மயில்கள் அவற்றின் குஞ்சுகளை அம்போ என்று விட்டு விட்டு ஓடுவது இல்லை.

நீண்ட தோகை அவற்றின் வேகத்திற்கு அணை போடுவதாக தோன்றலாம். இருந்தாலும் பறக்கத் தொடங்கும் போது அதன் நீண்ட தோகை சற்று இடைஞ்சலாக இருப்பது போல தோன்றும். ஆனால் மேலே கிளம்ப ஆரம்பித்து விட்டால் இறக்கைகளைப் படபடவென்று அடித்துக் கொண்டு மிக வேகமாய் பறக்க ஆரம்பித்துவிடும்.

குஞ்சுகளுக்கு எட்டு மாதம் ஆகும் போது தாய் தந்தைக்கு டாட்டா சொல்லிவிட்டு தங்களையே கவனித்துக் கொள்ள ஆரம்பிக்கின்றன. இவை வீட்டை விட்டு கிளம்பிய பிறகு தாய் பறவை அடுத்த சந்ததியை உருவாக்கத் தயாராகி விடுகிறது.


சுமார் எட்டு மாதங்களில் ஆண் குஞ்சுகளுக்கு அவற்றுக்கே உரிய தனிச் சிறப்புமிக்க தோகை முளைக்க ஆரம்பிக்கிறது, ஆனால் முழுமையாக வளர நான்கு ஆண்டுகள் பிடிக்கும். பின்பு அவை சொந்தமாகவே ஒரு குடும்பத்தை உருவாக்கத் தயாராகி விடுகின்றன. சரி.

மயில் என்றால் அனைவருக்கும் பிடிக்கும். மயிலை எங்கே பார்த்தாலும் சரி. இடத்தை விட்டு நகர மாட்டோம்.  நின்று ரசித்து கொண்டு இருப்போம். அந்த அளவுக்கு மயில் அழகோ அழகு.

இந்தியாவின் தேசியப் பறவை என மயிலுக்கு மணிமகுடம். நிச்சயமாகவே மயிலுக்கு ராஜ மிடுக்கு இருக்கிறது. அதனால் தானோ என்னவோ அகந்தை கொண்ட மனிதரை மயிலைப் போல கர்வம் பிடித்தவன் என்று சொல்வார்கள்.

மயில் தோகையை விரித்து நடனம் ஆடினால் மழை வரும் என்று சொல்வார்கள். மழை வருமா வராதா தெரியாது. ஆனால் அது நடனமாடும் அழகே தனி. அந்த நடனத்தைப் பார்த்து பெண் மயில்கள் சொக்கி ஏமாந்து போகும்.

அழகு இருக்கும் இடத்தில் கர்வம் இருக்கும். ஆனால் மயில்கள் மிக சாந்தமானவை. தன்னுடைய அழகில் மமதை இல்லாதவை.

ஆண் மயில் தன் தோகையை விரிக்கிறது. விரித்து உலகத்தில் உள்ள மக்களுக்கு அழகு காட்டுகிறது. அதன் மூலம் என்ன சொல்ல வருகிறது தெரியுமா.


எல்லா ஆண்களும் அழகானவர்கள் என்று சொல்லாமல் சொல்ல வருகிறது. அதற்காகப் பெண்கள் கோபப்பட வேண்டாம். உண்மை தானே.

ஆண்கள் எப்போதும் அழகு தான். அந்த ரகசியம் எல்லா ஆண்களுக்குத் தெரியும். என்ன ஆண்கள் தங்களின் அழகைப் பெரிதாக் காட்டிக் கொள்வது இல்லை. ஓர் அடக்கம். அவ்வளவு தான்.

ஒரு செருகல். இங்கே ஆண்களின் உடல் அழகையோ அல்லது அவர்களின் தொப்பை அழகையோ சொல்லவில்லை. அவர்கள் ஒரு குடும்பத்தைக் காப்பாற்றும் அழகைத் தான் சொல்ல வருகிறேன். புரியுதுங்களா.

மற்றபடி அழகு என்று சொன்னால் பெண்கள் தான் அழகு. அதில் மாற்றுக் கருத்துகள் இல்லை.

இல்லை என்றால் எத்தனையோ அழகு சாதன நிலையங்களின் கதவுகளை எப்போதோ இழுத்து மூடிவிட்டுப் போய் இருப்பார்கள்.

03 ஜூன் 2017

DLP இருமொழித் திட்டம் - 1

DLP இருமொழித் திட்டம் அமலாக்கம் செய்யப் படுவதற்குப் பல தரப்புகளில் இருந்து எதிர்ப்புகள் வலுத்து வருகின்றன. அண்மையில் புத்ரா ஜெயா கல்வி அமைச்சின் முன் அமைதிப் பேரணி ஒன்றும் நடந்து இருக்கிறது.


2016-ஆம் ஆண்டு தொடக்கம் மலேசியப் பள்ளிகளில் இரு மொழிக் கொள்கை அமலாக்கம் பெறுகிறது என கல்வியமைச்சு அறிவித்தது. 

அதன்படி தமிழ்ப் பள்ளிகளில் நான்காம் ஆண்டு தொடங்கி அறிவியல், கணிதம், தொழில் நுட்பம், புத்தாக்கம் ஆகிய நான்கு பாடங்கள் மலாய் அல்லது ஆங்கில மொழியில் போதிக்கப்படும்.

அப்படி ஓர் அமலாக்கத்திற்குச் சில வரையறைகளும் உள்ளன. DLP இருமொழித் திட்டம் அமலாக்கம் செய்ய விரும்பும் ஒரு பள்ளியில் போதுமான ஆங்கில மொழி ஆசிரியர்கள் இருக்க வேண்டும். 

அந்தப் பள்ளியின் மாணவர்கள் ஆங்கில மொழியில் புரிந்து கொள்ளும் தகுதிகளையும் பெற்று இருக்க வேண்டும்.

அதன் பின்னர் தான் அந்த நான்கு பாடங்களையும் ஆங்கிலத்திலேயே போதிப்பதற்கான வசதிகள் செய்து தரப்படும். இந்தப் பரிச்சார்த்த முயற்சிக்கு 300 மலாய் தொடக்கப் பள்ளிகளை அரசாங்கம் தேர்வு செய்தது. சரி.


இந்தத் திட்டம் தேசியப் பள்ளிகளில் மட்டுமே அமல் செய்யப்படும் என்றும் அறிவிப்பு செய்யப் பட்டது. ஆனால் தமிழ்ப் பள்ளிகளில் அதன் தாக்கங்கள் துரிதமாகப் பரவத் தொடங்கி விட்டன.

இந்தத் திட்டத்தைச் சீனப் பள்ளிகள் முற்றாகப் புறக்கணித்து விட்டன. அரசாங்கம் இதை நன்றாகவே எதிர்பார்த்தது. அதன் காரணமாக தேசியப் பள்ளிகளை மட்டும் அந்தத் திட்டத்திற்கு முதலில் உட்படுத்தியது. இருந்தாலும் மலாய் சமூகத்திலும் பல்வேறு வகையில் எதிர்ப்பு அலைகள்.

ஒரு மொழியின் மீதான ஆற்றலை மேம்படுத்த வேண்டும் என்றால் முதலில் அந்த மொழியைப் போதிக்கும் நேரத்தைக் கூட்ட வேண்டும். அடுத்து ஆங்கில பாடத்தைப் போதிப்பதில் சிறப்புத் தேர்ச்சி பெற்ற ஆசிரியர்களையும் பணியில் அமர்த்த வேண்டும். 


அப்படி இல்லாமல் மற்ற பாடங்களை உடனடியாக ஆங்கிலத்திற்கு மாற்றுவது என்பது மலாய் மொழிப் பள்ளிகளின் தேசிய மொழிக் கொள்கைக்குக் குந்தகம் விளைவிக்கும். மலாய் கல்விமான்கள் பலர் அவ்வாறு மாற்றுக் கருத்துகளை முன்வைத்தனர்.

தமிழ்ப் பள்ளிகளிலும் இந்தப் பிரச்சினை தொடர்பாக இருவேறு கருத்துகள் நிலவுகின்றன. அவை என்ன கருத்துகள் என்பதை அடுத்த பதிவில் தெரிவிக்கிறேன்.

சிவராசா எல்லை மீறிவிட்டார்

சிலாங்கூர் சுல்தான் பகிரங்க அறிவிப்பு

(நன்றி: செல்லியல்)
சான்று: http://www.selliyal.com/archives/150388

ஷா ஆலாம் – இங்குள்ள பள்ளிவாசல் ஒன்றில் நோன்பு துறக்கும் நிகழ்ச்சி ஒன்றில் கலந்து கொண்ட சிலாங்கூர் சுல்தான் ஷரபுடின் இட்ரிஸ் ஷா, தனது உத்தரவை மீறி பள்ளி வாசல் ஒன்றில் அரசியல் உரை நிகழ்த்தியதற்காகச் சுபாங் நாடாளுமன்ற உறுப்பினர் சிவராசா மீது நேரடியாகத் தனது அதிருப்தியைத் தெரிவித்து இருக்கிறார்.

சிவராசா ‘தனது செயலால் எல்லை மீறிவிட்டார்’ எனப் பகிரங்கமாகக் கூறி இருக்கிறார்.

முஸ்லீம்களாக இருந்தாலும் சரி முஸ்லீம் அல்லாதவர்களாக இருந்தாலும் சரி யாரும் பள்ளி வாசலை அரசியலுக்குப் பயன்படுத்தக் கூடாது என நான் உத்தரவிட்டு இருக்கிறேன். சிவராசா எனது உத்தரவை மீறிவிட்டார். எல்லை மீறிவிட்டார் என சிவராசாவின் பெயர் குறிப்பிட்டு சிலாங்கூர் சுல்தான் உரையாற்றினார்.

இதற்கிடையில் சிலாங்கூர் சுல்தானுக்கு விளக்கக் கடிதம் ஒன்றை அனுப்பப் போவதாகக் கூறி இருக்கும் சிவராசா, தான் இன்னும் அந்தக் கடிதத்தைத் தயாரிக்கும் பணியில் ஈடுபட்டு இருப்பதாகத் தெரிவித்து இருக்கிறார்.

“பள்ளிவாசல்கள் தொழுகைக்குப் பயன்படுத்தப்பட வேண்டும். மதத்தைப் பற்றி மேலும் கூடுதலாகத் தெரிந்து கொள்ளும் மையங்களாகத் திகழ வேண்டும், முஸ்லீம்களை ஒன்றுபடுத்த வேண்டுமே தவிர மாறாக பிளவுபடுத்தக் கூடாது.

பள்ளிவாசல்களை நிர்வகிப்பவர்கள் பள்ளிவாசல்களில் அரசியலை அனுமதிக்கக் கூடாது என்ற தனது உத்தரவை மதிக்க வேண்டும்” என்றும் சிலாங்கூர் சுல்தான் தனதுரையில் வலியுறுத்தினார்.

01 ஜூன் 2017

தமிழ்ப்பள்ளிகளே தமிழர்களின் அடையாளம்

தமிழ்ப்பள்ளிகளே தமிழர்களின் அடையாளம். தமிழராய்ப் பிறந்த ஒவ்வொருவரும் தமிழ் மொழியைத் தாயாக மதிக்க வேண்டும். தரணி போற்றும் மொழியாகத் தமிழை உயர்த்த வேண்டும்.


ஈப்போ அரசினர் தமிழ்ப்பள்ளியில் பயின்று இப்போது அமெரிக்கா புளோரிடா அனைத்துலகப் பல்கலைக்கழகத்தில் நுண்ணுயிரியில் மூலக்கூற்றுத் தொற்று நோய்ப் பிரிவில் பேராசிரியராகப் பணி புரியும் டாக்டர் கலைமதியின் அறைகூவல்.

தமிழ்க்குயிலார் கா.கலியபெருமாள் அறக்கட்டளையின் சார்பில் பேராக் மாநிலத் தமிழ்ப்பள்ளி மாணவர்களுடன் *தமிழ்ப்பள்ளி மாணவர்களும் முன்னேற்றப் பாதையும்* எனும் தலைப்பில் நடைபெற்ற  கலந்துரையாடல் நிகழ்ச்சியில் அந்த அறைகூவலை விடுக்கப்பட்டது.

தமிழ்ப் பள்ளியில் பயின்றவர்கள் உள்நாட்டிலும் வெளிநாடுகளிலும் பல முக்கியப் பதவிகளில் சேவை செய்கின்றனர் என்பதற்கு டாக்டர் கலைமதி ஓர் எடுத்துக்காட்டு.

25 மே 2017

பெண் புத்தி பின் புத்தி

பெண்கள் எப்போதுமே எந்த ஒரு விசயமாக இருந்தாலும் அதன் பின்விளைவுகளை ஆராய்ந்தே முடிவுகள் எடுப்பார்கள். 


கல்வி ஆகட்டும், காதல் ஆகட்டும், குடும்பம் ஆகட்டும். எந்தப் பிரச்சனை வந்தாலும் அதற்கு தான் எடுக்கும் முடிவு எந்த அளவு பின்விளைவுகளைத் தரும் என்பதை நன்கு யோசித்து விட்டு அதற்குத் தகுந்த முடிவைத் தான் அவள் புத்தி சொல்லும்.

பெண் புத்தி பின் வருவனவற்றை யோசித்து விட்டு சொல்லும் புத்தி என்பதைத் தான் பெண் புத்தி பின் புத்தி என்றார்கள்.

இதை நாம் எந்த இலட்சணத்தில் புரிந்து கொண்டோம் என்பதை நான் சொல்லத் தேவை இல்லை. உங்களுக்கே தெரியும். பெண் இல்லாமல் எந்த ஓர் ஆணும் பேர் முடியாது.

உண்மையிலேயே பெண் புத்தி முன் புத்தி என்று தான் சொல்ல வேண்டும். அதற்காகப் பெண்களுக்குத் தலைக்கனம் பிடிக்காமல் இருந்தால் சரி.